Garsoore Cumar Cabduqaadir Cartan oo loo diiday inuu galo dalka Mareykanka si uu u dhex dhexaadiyo Koobka Adduunka 2026 ayaa Talaadadii dib ugu laabtay dalkiisa isagoo ka dhoofay Istanbul.
Cartan waxa uu sheegay in “riyadii ugu waynayd ee nolosheyda” ay go’day ka dib markii lagu celiyay xadka Maraykanka, waa sida ay qortay TRT. “Aad iyo aad ayaan u niyad jabsanahay,” Cartan ayaa u sheegay New York Times isagoo ku sugan Istanbul, halkaas oo uu ku laabtay ka dib markii loo diiday inuu galo Miami.
“Kaliya waxaan ahay garsoore isku dayaya inuu ku noolaado riyadiisa, riyadiisii ugu weyneyd ee nolosheyda, inuu imaado koobka aduunka.”
Cartan waxa uu sheegay in waraysi qaatay 11-saacadood uu la yeeshay saraakiisha xuduudaha ee garoonka diyaaradaha ee Miami,kadibna la geeyey qol lagu hayo oo lagu xidhay dhawr saacadood oo dheeraad ah ka hor inta aan la saarin diyaarad dib ugu laabatay dalka Turkiga. “Waxaan haystay waraaqo sax ah iyo wax walba, waxaan haystay fiisaha saxda ah,” ayuu yiri.
Cartan, ayaa sannadkii 2025-kii loo magacaabay garsooraha sannadka ee xiriirka kubadda Cagta Afrika, wuxuuna noqon lahaa qofkii ugu horreeyay ee Soomaali ah oo garsoore ka noqda Koobka Adduunka.
Cartan ayaa la siiyay fiisaha uu ku tagi karo dalka Mareykanka todobaadkii hore, sida ay sheegtay safaaradda Soomaaliya ee Kenya oo soo baartay. Tallaabada lagu diidayo ogolaanshaha rasmiga ah ee FIFA ay magacaawday in lagu galo Koobka Adduunka ayaa ah mid aan caadi ahayn. Cartan ayaa lagu waday in uu la kulmo garsoorayaasha kale ee koobka adduunka ku sugan xaruntooda tababarka ee Miami.
“Waxaan rabay inaan u mahadceliyo FIFA oo i garab istaagtay iyo dhammaan shacabka Soomaaliyeed, marka waxaan aad ugu mahadcelinayaa FIFA iyo CAF (Xiriirka Kubadda Cagta Afrika), sidaas darteed waxaan leeyahay” ayuu yiri Cartan oo saxaafadda kula hadlay garoonka Istanbul ka hor inta uusan duulin diyaarada Turkish Airlines ee ku wajahan Soomaaliya.
Haddaba saakay ayuu ka soo degay Garoonka Diyaaradaha ee magaalada Muqdisho, waxaana soo dhoweeyay wakiilo ka socday xiriirka Soomaaliyeed ee kubada Cagta, Garsoorayaal Soomaaliyeed, qeybaha bulshada rayidka ah, iyo shacab aad u fara badan.
“Haddii aan Muqdisho joogo, berri subax waan ka qeyb geli lahaa soo dhoweynta ninka maanta dunida ugu hadalheynta badan ee sida aan maqlayo lagu ciilay in uu Soomaali yahay.
Waa seedhiwale ay FIFA ugu talo gashay in uu Garsoore ka ahaado Koobka Adduunka ee Kubbadda Cagta.
Waa nin dhallinyar oo marxalad adag oo dalkeennu ku jiray ku soo koray, laakiin aan is dhiibin ee isa soo saaray, Afrika ugu sare maray, gaarayna higsigiisa oo ka mid noqday garsoorayaasha Koobka Adduunka ee kubbadda cagta.
Haddii aanuu is dhiibin, si miisaaman uu u maareeyo caradiisa ku aaddan fursadda uu ku guuleystay laakiin laga hor istaagay, ka mahadceliyo shidaalna ka dhigto falcelinta dhallinyarada Soomaaliyeed, Qaaradda Afrika iyo tan caalamiga ah ee isaga taageersan, waxaan ku kalsoonahay in uu gaari doono guul tan aad uga sii sarreysa, sidaasi waxaa yiri:- Wasiir hore ee Arrimaha dibadda mudane Yuusuf Garaad Cumar.
Dhinaca kale Hey’adda maamusha kubadda Cagta Adduunka FIFA ayaa laga codsaday magdhaw, kaddib markii fiisihiisii dal ku galka Koobka Adduunka la baajiyay garsoore Soomaaliyeed. Garsoore Cumar Crtan ayaa laga mamnuucay inuu galo dalka Mareykanka, si uu uga qeyb galo Koobka Adduunka 2026-ka, kaasi oo lagu qabanayo wadamada Maraykanka, Mexico iyo Canada, arrin sababtay is hortaag ah inuu galo magaalada Miamo ee cariga Maraykanka, isagoo filayay inuu noqdo garsoorihii ugu horreeyay ee Soomaali ah ee ka garsoora Koobka Adduunka, ayaa loo diiday gelitaanka Mareykanka inkastoo la sheegay inuu haystay fiise sax ah.
Madaxii hore ee hay’adda garsoorayaasha Ingiriiska ee PGMOL, Keith Hackett, ayaa uga digay FIFA in ay magdhow siiso Artan haddii uu waayo fursaddii uu kaga qeyb geli lahaa tartanka sababo la xiriira tallaabada ay qaadeen maamulka Mareykanka. Hadalladiisa ayaa kusoo beegmaya iyadoo dood xooggan laga keenay caddaaladda iyo saameynta go’aankan ku yeeshay garsooraha Soomaaliyeed.
FIFA ayaa sheegtay in aysan ku lug lahayn go’aannada socdaalka ee waddanka martida loo yahay oo lagu wargeliyay in xaaladda Artan aan la beddeli doonin waqtigan.
Warbixinno cusub ee soo baxaya ayaa muujinaya in FIFA lagu cadaadinayo inay bixiso lacag mag‑dhow ah oo loo maro Garsoore Omar Abdulkadir Artan, kaddib markii si sharci‑darro ah looga hor istaagay inuu ka shaqeeyo Koobka Adduunka 2026-ka, waxaana la filayaa in Kiiskan uu noqday fadeexad caalami ah, waxaana cadaatay in xuquuqdiisa shaqo iyo sumcaddiisa xirfadeed ay si weyn u dhaawacmeen, iyadoo dalabka mag‑dhowga waa mid lagu doonayo in lagu qiro khaladka dhacay iyo khasaaraha soo gaaray garsooraha Soomaaliyeed.
Garsoore Cumar Cabdulqaadir Cartan ayaa sanadkii 2025-kii loo magacaabay garsooraha ugu wanaagsan Afrika, waxaana ka maqnaanshihiisa Koobka Adduunka loo arkaa khasaare weyn oo soo gaaray isaga iyo guud ahaan kubadda Cagta Soomaaliya.
By. Cabdullaahi Ruush
Be First to Comment