Gabaygan wuxuu abwaanku u tiriyay Faadumo-Sahra Sheekh Xuseen. Wuxuu yidhi:
- Saddaxduu Ogaadeen ka dago, sabada ciiddeenna
- Sarsarrada Isaaq iyo Hartiga, soona bari yaalla
- Saransoor Siddeed iyo Sagaal, nimanka reer Saylac
- Salaadiinta aw Yuusuf iyo, suubbanow Tanade
- Safafkii Abgaal iyo Hawiye, siman intay joogto
- Suleekhooyinkeenniyo gabdhaha, quruxda loo saanto
- Soomaali oo idil markaan, shiishka wada saaray
- Faaduma-Sahrooy dumarka, waad ugu sarraysaaye
- Sida anigu aan qabo hablaha, waad u sidataaye
- Subaxii lagaadhaba waxaan, saadsho waa adiye
- Sida ayra geel oo horwayn, soof ku wada aadday
- Oo meel sifaar iyo nimca leh, sano ka daaqaysa
- Ama sagal arooryiyo hillaac, dunida saameeyay
- Sifadoodi leeyeey naftaad, siisay farax wayne
- Jacaylkaagu seeddiyo laftuu, saafiyay xulaye
- Sadrigayga iyo laabta buu, sulunsulxeeyaaye
- Saldhiggiisa weyn iyo halkay, saanaddu u taallo
- Waa sidaha dhiiggiyo wadnaha, surumadiisiiye
- Sambabada dhaxdooduu bullo iyo, saar ka tumayaaye
- Saqda dhexe habeenkii hurdada, sixirku ii diidye
- Sahwi igu abuur iyo cuntada, inaan ka soomaaye
- Sawir been ah oon jirin mar buu, ii sallaxayaaye
- Marna seer-ma-waydiyo gu' buu, igu sabaalayne
- Sanqadhiyo marbuu diidayaa, sawdka aadmiga e
- Mar hadduu silsiladduu watiyo, seefta kula aado
- Sahal kuguma dhaafiyo illeen, saatan iga daaye
- Saansaanka muuqdiyo xilligu, waa sidaan rabaye
- Mar haddaan samaan iyo kalgacal, oogu sacabbaynay
- Saatirkii na uumiyo Alluhu, wuu na saacidiye
- Ubaxaa sokeeyaha u baxay, aan biyaha siinno
Fure:
saddaxda: somaliya, kenya, iyo Itoobiya
saransoor: magac qabiil
siddeed iyo sagaal: magac qabiil
reer saylac: dadka daga saylac
aw-yuusuf: awrtable(qabiil)
siman: gabar magaceed
sifaar: geed geelu daaqo
|
Be First to Comment