Saaxiibayaaloow

The largest online collection of Somali poetry

24 August 24, 2003 ayuu maansadan diiniga iyo dardaaranka ah Maxamed 

curiyey. Wuxuu yidhi isagoo dhaqankan xun ka hortagaya ka fiicana faraya:

· Sigaarka iyo jaadkiyo

· khamri lagu sarqaamaa

· saqaafaha habeenkii

· inaad saamaleyshaan

· ama maanka suulood

· darbiyada salaantaan,

· ood dumar salaaxdaan

· sumcad-xummiyo silac iyo

· dhaqan-suulay weeyaan,

· saaxiibbayaaloow

· mowd baa na sugayee

· salaadaha u sarakaca

· Sun weeyaan sigaarkoo

· sanka qaaca kaa bixi

· eed sahashaneysee

· saxansaxa udgoon iyo

· sagal kuula muuqdana

· sidayaasha-dhiiggiyo

· sambabuhuu waxyeelaa

· kansar seedda-hoosiyo

· saableyda beerka ah

· sifriyuu horseedaa,

· saaxiibbayaaloow

· mowd baa na sugayee

· salaadaha u sarakaca

· Waxaad jaad ku salashiyo

· waxaad bari sarqaantiyo

· waxaad leyl siyaaxdaba

· waxaad suxulka laabtoo

· dubaab kugu salcaamaba

· ama aad sawirataa

· samma-jeexayaal iyo

· saro loo suwaaqtago

· sakan lagu caweeyaa,

· saaxiibbayaaloow

· mowd baa na sugayee

· salaadaha u sarakaca

· Saban-hore waxaa jiray

· gabdha wada suleeqa ah

· gacan kugu salaameyn

· sarajoog rag uga kaca

· sawjiyo hannaankeed

· Soomaalinimo wacan

· raggoo sooryo dhiibiyo

· soddoh iyo xigaaliyo

· seeddi laga xishoodaa

· maantana sidey tahay

· waa lama sifeeyaan

· saaxiibbayaaloow

· mowd baa na sugayee

· salaadaha u sarakaca