Saafi Bulux Xirsi

Ismaaciil Saciidow ma tirin, aalladdii gabaye

Meeshiyo sidaad ii ogayd, aabo kama hayne

Afkaygii waxaan uga ceshaday, uurku taallada’ e

Adigu iyo Khaliif maansadii, or uma qaadaane

Aw-Jaamac iyo Geelle way, aga maraayaane

Cabdi-foolxun waa kaa askumay, toban ayaamoode

Nimankii isyaanada ahaa, eray ma sheegaane

Aqli baad lahaydeen haddaad, edeb samaateene

Erey waxaan ka idhi xaajo aan, oday ka sheekeynin

Erey kalana waa xaajadii, lala ilmeynaayey

Erey kalana waa Eebahay, midaan ka eegaayo

Erey waxaan ka idhi xaajo aan, oday ka sheekeynin

Iyadoo irmaankiyo lo’diyo, adhigu guulaayo

Iyadoo asqaran beeshu tahay, adhaxda jiilaalka

Waligood sidii loo askumay, Aadan iyo Xaawo

Ebid waxaan la arag ceelkan oo, la iska oodaaye

Erey kalana waa Xaajadii, lala ilmeynaayey

Geelleena ooddiyo dilkiyo, uli ma gaadheene

Biyihii Aloosane ku jirey, lagama oodeene

Afkaygoon arwaax kale lahayn, ugama oomeene

Isaaq maganti kuma dhaansadeen, toban ayaamoode

Ingiriis ma yeeline kuwii, na ublikeynaayey

Labadeena oday baa ahayd, ab u collowgaase

Arxan horaba noogama dhaxayn, aniyo Iidoore

Naga aarte nimankii garbaha, iinta ku lahaaye

Erey kalana waa Eebahay, midaan ka eegaayo

Illaahiyo asmada diinta iyo, udubka Jiilaani

Awbaahilaabiyo intaan, ehel wadaageynay

Awliyo dhammaanteed waxaan, u Alla dhaawoodey

Haddaan amarka Eebbaa hayee, nalagu soo oodin

Nabsi aan kollaba oolin waa, la arki doonaaye