Gummaysiga

Jiiftadan wuxuu Maxamed Stanza kaga waramayaa dhibaatada gummeystuhu dhallinta iyo mufakiriinta dalka u geysto iyo sida ba’an ee uu u curyaammiyo una cabbudhiyo garaadkooda waddaninimo. Wuxuu u bixiyey Gummeysiga kuna bilaabay:

• Sidii bey gantaaladu

• wali iigu go’ayaan

• oon u garab bannaanahay

• sidii bey gabbaad-daran

• gacal male shisheeyee

• wali ii giriifaan

• sidii bey gabbaantii

• iiga gaagaxshaanoo

• aan u gibilmadoobahay

• sidii bey gun weeyee

• iigu giijiyaanooy

• ii goondhabeeyaan

• sidii bey galgalintii

• iigu gooddiyaanooy

• ii gacanbidxeeyaan

• sidii bey garneylkiyo

• gudban miino-jalaftii

• wali iila gaadaan

• sidii bey gawaaridu

• gurxan iigu dhaafaan

• oon u garabrucleeyaa

• sidii bey gudgudihiyo

• gugu iigu hooraan

• oon la-ii-garwaaqsanin

• anna gaabin maayee

• gobaad maansadeydaan

• gaashaan xariirtaa

• Sidii bey gujadi iyo

• gurro iigu qariyaan

• ooy ii gabraaraan

• sidii bey gammuunkiyo

• fallaadh ii gig-siiyaan

• ooy ii gandilayaan

• sidii bey gamboolkiyo

• dhiillo ii gujixiyaan

• oon u gaardaymoodaa

• sidii bey gashaantiyo

• garoob ii yiraahdaan

• maxaa sidatan kuu galay

• sidii bey gurboodkiyo

• nimmaan iga golrooneyn

• giddi ii huruufaan

• sidii bey gubnood iyo

• gaaheyr iigu sheegaan

• oon galiilyo ooyaa

• sidii bey gammaankiyo

• geela iiga qaadaan

• guluf iigu kiciyaan

• sidii bey garaadkiyo

• gadhka iiga laadaan

• ooy iigu gaydhaan

• anna gaabin maayee

• gobaad maansadeydaan

• gaashaaxariirtaa

• Anoo gaban ohoo dihin

• ayuu gacalayaaloow

• I caddaaday guudkii

• anoon gaajo arag wali

• gu’ labaatan sano jira

• ayaan golongol liicaa

• giiryaale ma ahiye

• gabbashada waxaa I baray

• gummeysigan I daashaday

• haddaan la I gummaadeyn

• gayigeygu ladanyahay

• gabayada ma curiyeen

• guhaad-olalka aan qabo

• wadnaha gaararkiisiyo

• waa mid gubay jirkeygii

• geenyadeenna oo dilan

• gayigeenna oo dhacan

• gamma’ waa iga xaaraan

• garac uu Tigree dhalay

• gabdhaheenna oo sida

• sideen guri ku jiifnaa?

• Anna gaabin maayee

• gobaad maansadeydaan

• gaashaan xariirtaa

• Geesiyada halgammayoow

• guubaabadeydiyo

• bal guddoomma maansadan

• burhaan gummaca’ weeyoo

• geeddi socodka guushaan

• ku gargaar isleeyahay

• kuwaan gacal wadaagnoow

• geeraarkii ismuu dhimmin

• garashana halkeedii

• golaheennan guudoow

• faras kaa ila gaabshee

• inaan gudhay ha moodina

• gaagaabtaa ureysiyo

• giddi gaalo-qudhunleey

• waan ka gacansareynaa

• gabadhaan jeclaayeey

• gobolku wuu xoroobiye

• iga daa gubtaanyada

• Gini oo ilmada qubi

• inaan gogol caweynaa

• waa guuldarriyo ciil

• gaatirloow Wayaanaha

• inaad gowracdaan iyo

• geerida ka doorbida

• anna gaabin maayee

• gobaad maansadeydaan

• gaashaan xariirtaa

• Waxa aan la golongolay

• ilmadu iiga gobo’leyn

• garab gorayo weeyaan

• guuleystayaaloow

• guntada oo gurmada oo

• marna yaan la gabi dhicin,

• giddi gaydha oo kaca

• gabdhihiyo raggeennoow

• geerida ha diidina

• guyaal iyo guyaal bey

• na gidhaashayeenooy

• guunyana na dhaafsheen

• gabbalkoodu wuu dhacay

• oo gabaabsi weeyee

• haraatida ku giijiya

• gobanimadu waa dahab

• ninkii gini ka doortoow

• gunnimiyo gaf weeyaan

• siyaasadan gurracanee

• goodku uu ku ladhanyahay

• yaan lagugu gaacinin,

• diida gaboodfalkoodiyo

• gunnadooda boogta leh

• go’aankeennu gacan hadal

• anna gaabin maayee

• gobaad maansadeydaan

• gaashaan xariirtaa

• Inkastoon gabyaa iyo

• geeraarshe caanbaxay

• garruud aanan wali noqon

• ma garoocsha goolkoo

• gallad-Eebbe weeyee

• xaqaan ugu garbeeyaa

• ka gaboobi maayoo

• gacanteydi midig iyo

• garoonteydi weeyaan

• markuu geelu horanyahay

• goray ugumma heesoo

• waa godobtirkeygii

• rag baan gabiga dheer iyo

• midka gaaban ee sare

• gacan ooga haadshaa

• gabbal dhac iyo waaberi

• marka la isku geeyaa

• gundhiggaa u doorroon

• waxaan uga gol leeyahay

• dhulku gees illaa gees

• guul-oomman weeyaan

• anna gaabin maayee

• gobaad maansadeydaan

• gaashaan xariirtaa.