Galiilyo

Gabaygan waxaa curiyay Abwaan Maxamad Cabdiqaadir Daauud [Stanza]

kaddib markii gabadhuu jeclaa, muddo sannadda ah ay sheeka wadaag lahaayeen, Aabbaheed nin dalka dibaddiisa ka yimid ku daray. Wuxuu gabayga sammeeyay taariikhdu markey aheyd: July 23, 2002.

• Inkastoon guhaad-olal qabooy, gubatay laabtaydu.

• Ama aan galiilyoodayoon, guurabahalleeyay.

• Ama aan gama’ba diidayoo, gibilku ooyaayo.

• Ama aan gacalayaaloow guntaday, gulufka heensaystay

• Gadaal bay wax iga soo cesheen, hilibku geed baase

• Gayaankaba hablaha kacay middaan, galiyay maankayga.

• Gacalooy middaan idhi, middi aan u gacanhaadshay

• Guyaal iyo guyaal middaan, samo la goobaayay

• Middaan geenya-nuuroow lahaa, goor walbiyo leylba.

• Goobtaan istaagaba midduu, uurku goconaayay.

• Gabbalkii guduutaba middaan, geeddan ugu dhiirtay.

• Gundhiggeeda maansada middaan, gobo’di taabsiiyay.

• Gabayada jacaylka ah middaan, oogu guraabaasay

• Middaan soo gardaadiyeen, gallin la haasaaway

• Xummaantana middaan kala gubteen, gadaf u diidaayay

• Aabbaheed gob weeyee middaan, dabinba goobaayay.

• Hooyadeed gaari weeyee middaan, guudka ka inshaartay

• Gammaanooy middaan idhi middaan, ubax guddoonsiiyey

• Gadgaddoon habeenkii middaan gogosha diidaayey

• Inaan guri la seexdaa middaan, ugu gubaabyooday

• Middaan dumar u gooyayeen, ugu galaalxooray

• Garaad iyo middaan idhi, gaban ha kuu qaado

• Middaan godob ma fiicnee, gacanta siinaayay

• Gurigey ku nooshahay middaan, gaafwareegaayey

• Garbigey caweysaba middaan, ugu geeraaraayey

• Gorgor duuli iyo middaan, goodba u huruufay

• Gayigoo barwaaqa ah middaan, gaajo dalambaabay.

• Nin gob iyo garaad sara, middaan gacan u gaarsiiyay

• Weerar soo gawaarsaday midduu, gummucu ii wiiqay

• Gantaalada middaan ugu gabgabay, garabku ii naaftay.

• Goordoon middaan ku kala guurnay ugu gafuurtuuray

• Galbis iyo aroos wacan middaan, galab la doonaayay.

• Guubaabadeydii middaan, ugu garbaynaayay

• Goolkaan u oonneen markuu, maanta godol qaaday

• Ahey! Inuu gaagaxaa waa ii, guuldarriyo ciile

• Iney aniga igu giiratana, waa gunnimo weyne

• Ahey! Iney garoobaysaana, gaabisnimadeeda

• Habluhu kala garaad wacan, kala gayaan roone.

• Goombaar iyo waxey kala yihiin, Goray haldhaagiiye.

• Nin aan gacal wadaagnaa ku baxay, gari la moodiiye.

• Oo geenyo tima-dheer hantiyay, gabi ahaanteede

• Ahey! wuu i gaadaye Wallee, igama guuleysan.

• Guddigaan kal-hore sii diraa geela dhicin waayey

• Oo igu gaboodfalayoo howshi, gudan waayay

• Anoo yara gammuunyooday bay, igu gabraareene

• Anoon gudunti soofeysan bay, gaas i mariyeene

• Waloow ay gammuun ila heleen, oo la i gawaan raacshay

• Oo ay nin godobteyda qaba, guri u xaareyso

• Geesi iyo gabyaa baan ahaye, way i garanweyday

• Ma gabada nindoor baan ahaye, soo galaal kacaye

• Iney reer tolkey ii gafeen, shacabka gaarsiiya

• Aniguna inaan gabay ku ciilbaxay, gurun ha loo geeyo