Tixdaan Gabaygaa oo gaaban waxaa tiriyey Cumar Cabdinuur Nuux 8/10/02. Waxay ka hadleysaa dhibaatada waddankeenna ka taagan. Ragga siyaasiyiinta isku sheegaya oo ah rag aan u qalmin in ay hogaamiyaan ummadda ay horboodayaan. Balse iyaga qudhoodu ay yihiin asalka iyo aabbaha mushkiladda Soomaaliya.

• Deggen inan yar oo goor barqaa, dooxadatu fuushay

• Umul deyrka gurigeedii hore, lagu dukhuulaayo

• Iyo hooyo doorkay dhashaba, duugta laga yeelay

• Duq waayela digtoor iyo wax-garad, culimadii diinta

• Daacaddiyo intii nabadda jecel, loosa dacareeyey

• Dan-yartiyo masaakiinta aan, cidi dar yeeleynin

• Inta dibadda joogtee qurbaha, dayac ka meel waayey

• Dalandoolka sida doon caqaa, dociba meel aadday

• Ee dooraweynow kufrigu, dabinnadaw qoolay

• Rag baa doolar laceggeed ku hela, dhiiga daadanaya

• Rag baa daaro waaweyn ka gaday, cadaw dillaalkiiye

• Rag baan dooneyn inaan soo kabtaba, boqol diraacoode

• Dawladnimo rag baa diidey oo, doonin oo nacaye

• Dulmigiyo dhibaatada rag baa, door walbaba wada e

• Fidno laga dawoodaba rag baa, daarayoo hurine

• Deriskii heshiiyaba rag baa, dacar ku nooleyne

• Dukun-daakun inay naga dhigaan, waa rag loo diraye

• Ilaahoow dadkaas naga qabqabo, kuu dacwaan nahaye

• Ilaahoow adaa daa’iinoo, dunida maareeya

• Dadka noo tashaday oo na dilay, oo nadabar gooyey

• Daalucul quuluubow adaa, daawan oo garane

• Ninkii samaha diidaa Alloow, dabinka uu laaco

• Dumbaaburaha uu hurinayaa, daaro maradiisa

• Isagoon digniin qabin Alloow, qolo kalow duugto

• Dadka iyo dalkuba waa bestood, daqaradii gaaray

• Duunyo nooma nooloo beryahan, lama daryeeleyne

• Ilaahoow dadkaas naga qabqabo, kuu dacwaan nahaye

• Inkastoon dambownoo in badan, dalag xun aan beernay

• Dariiqii habboonaa Rabbow, dabamaryow qaadnay

• Ducadiyo baryada naga ajiib, kuu dacwaan nahaye

• Eldooreete kii diida ee, nabadda diihaalsha

• Ama doodda dheereeya ee, xumaha doon doona

• Danta guud ka door bida inuu, kaligi xoor daaco

• Daalucul quuluubow adaa, daawan oo garane

• Dawaarkuu meeleegaayo iyo, wuxuu daneynaayo

• Darka caaro gurigeed ka yeel, kuu dacwan nahaye

• Diyaaradaha sii wada raggaan, Diridhabow qaada

• Ninka duulinaayaana yahay, cadowga diinteena

• Damiirkoodu see ugu xasilay, gaalka daranyeysan?

• Intaas oo shirbaa loo dalboo, looga soo digaye

• Dacwad bay ka keenaan haddana, kala dareeraane

• Duweylaad yar bay wada rabaan, inay dul joogaane

• Qaran dumay rag soo celin karaa, doorkan ha yimaado

• Ama Daanya Aramooy ku dhaha, nagu dillaal qaado

• Adinkuna sidii diiq is helay, baalasha is diirta

• Dagaal ooge wixii lagu yiqiin kolley ma dayaane

• Dadnimiyo xishood iyo malaha, aragti diimeede

• Hadba koobka malax loo daray, dalaq ka siiyaane

• Gumeystaha na dilayey intaas, dagal la jiifaane

• Hadba meeshii loo dira unbay, dali katuuraane

• Deris iyo qaraabey raggaan, kala dilaayaane

• Dumar iyo caruur bay kasli’i, duugayaan abide

• Dadka kii u xigay bay intaas, aakhirow diriye

• Dulmigooda naga qabo Rabbow kuu dacwaan nahaye

• Ilaahow adaa daahiroo, dunida nooleeya

• Ilaahow adaa deeqsiyoo, deeqdu kaa marane

• Darxumada na heysiyo Rabbow diifta nagu raagtay

• Dagaalada na wiiqiyo, raggaan gaalka daba jooga

• Dibad iyo gudaba xaaladuhu, waa ka sii dariye

• Deg deg nooga saar Khaaliqow, kuu dacwaan nahaye

Amiin-yaa Illaahii