Talo Abwaan

The largest online collection of Somali poetry

Gabaygani wuxuu ku saabsan yahay nabadaynta ummadda Soomaaliyeed. Wuxuu yidhi:

• Maanasada waxaan ku allifaa, idam Illaahaye

• Haddii uunan Alluhu ii sahlayn, eray ma sheegeene

• Inkastoon awow iyo abiyo oday, kasoo gaadhay

• Mawjad igu agtaallaa jirtiyo, badaan idlaanayne

• Masooo oodmo anigaaban rabin, hawl abwaanimo e

• Ayaamahaan shucuuraysnahaan, gabayga oogaaye

• Hadbana arimahaan doonayaan, ku anba qaadaaye

• Waxaanan ugu adeegtaa sidii, aalad xoog badane

• Albaabkaan ku liishaamo yuu, eber ka siiyaaye

• Inshaa Allaahu goortaan ku daro, eenan ka iloobin

• Ilaahay waxaan ka baryo, wuu iga ajiibaaye

• Islaamkana wax uguma dhimiyo, eed nimaan galine

• Inta badana diintiyo xaqaan, ku ijtihaadaaye

• Aslaaxu-beyna-naasiyo ducaan, ku Alla tuugaaye

• Umaddana wixii horumarlaan, ugu tilmaamaaye

• Waxba arartu yey ila durkine, waxaan kusoo duubay

• Ujeeddada murtida aan rabaan, idin ogeysiine

• Samaawaadka Eebbahay markuu, udub la’aan taagay

• Arladana ka dhigay gogosha, aan ku istareexayno

• Buurahana tiir lagu adkayn, Eebbe uga yeelay

• Dunidana badaha wada anfacay, Rabbi iraadeeyey

• Een in laga adeegtiyo sakhiray, doonyo ku ordaaya

• Ee laga ugaadhsado kalluun, Eebbe barakeeyey

• Istiraatijina laga dhigay ee, aadmigu u aayo

• Hooyo uur ku qaadiyo isagoon, aabbo laga beerin

• Nebi aadan Dhoobada markuu, Eebbe ka abuuray

• Ee Xaawo feedhiisa bidix, laga ahaysiiyey

• Aqala looga dhigay ee la yidhi, abid ku noolaada

• Malaa’igta Illaahay markii, amarka uu siiyey

• U sujuuda goortuu ku yidhi, ani addoonkayga

• Ibleyskii kibirku dhumiyeybaa, diiday amarkiiye

• Intii kalana Eebbaha xaqa ah, yey wada addeeceene

• Sidaa aawadeed yuu Ibleys, naar u iishadaye

• Hooyo uur ku qaadiyo isagoon, aabbo laga beerin

• Nebi Aadan dhoobada markuu, Eebe ka abuuray

• Ee Xaawo feedhiisa bidix laga haysiiyey

• Ee uu jannada uduga badan, ku istareexsiiyey

• Aqalla looga dhigay ee la yidhi, abid ku noolaada

• Malaa’igta Ilaahay markii, amarka uu siiyey

• U sujuuda goortuu ku yidhi, ani adoonkayga

• Iblayskii kibirkuu uu dhumiyey baa, diiday amarkiiye

• Intii kalana Eebaha xaqa ah yey, wada adeeceene

• Sidaa aawadeed yuu Ibleys, naar u iishadaye

• Ibleyskii khasaaray oo colaad, aadmiga u qaaday

• Arrimihii Ilaah daaya yidhi, ugu ammaan beene

• Goortuu ibleys dhaar u maray, toos u aamine e

• Amarkii markaasay jabsheen, Eebbahay faraye

• Ilaahay markuu hoobta yidhi ee, arlada keenay

• Ambadkii la kala dhumiyey yey, ka anfariireene

• Iyagoo is deydayahayoo, kala ugaadhoobay

• Kulankoodii Eebbahay haddana, dib u iraadeeye

• Awlaad mataaniyo intuu, Eebbe taransiiyey

• Aadmiga batee qaaradaha, iniba meel taalo

• Afrikaan madow iyo caddaan, midab idaylkiiba

• Aadan iyo Xaawaa dhaloo, waan ogsoonahaye

• Iskhilaaf dhaqana baa jiriyo diin la aaminaye

• Iyo luuqadaha kala anbaday, lay af garanwaaye

• Farqiyada irdaha ina dhexdhigay, waa arrimahaase

• Dawlado il-baxay baa dabeed, qaar addoonsadaye

• Aalad lagu hormaray baa jirtiyo, xoog itaal badane

• Aarmi iyo dhaqaaliyo hubbaa, loo adeegsadaye

• Iskaadh iyo qunbuladiyo haddaan, kaare lagu aarsan

• Aasiya, Amerikiyo Yurub Waarso idilkeedba

• Afrikaanka laga faanayaa, kamay adkaadeene

• Shan dawlaa adduunkii xukuma, oo adeegsada e

• Awood Fiito oo lagu qasbay, ku isticmaalaana

• Dawladdaan ka amar qaadan way, ula-qalweeyaane

• Sidii ubad la dhalay yey dabeed, edeb u siiyaane

• Arrimahaa wixii sababay yaan , idin ogeysiine

• Nagama aabo fiicnee raggaa, amar-ku-taagleeyey

• Awoowyadoodii dhalay bawga tagay, xeer asaasiya e

• Aano iyo qabiil bay naceen, ina-adeer sheege

• Iskhilaaf bulshada qeybiyay hog, ku abaaseene

• Iskaashiyo midnimo horumarley, ku intifaaceene

• Ilo-dhaqaale xoog lagu tabcay, u ololeeyeene

• Ujeeddaday rabeen yey markaa, ku istareexeene

• Sidaas aawadeed yey heleen, guul itaal badane

• Inaguna wxaaan eednay baan, daba ordaynaaye

• Arrimihii dib-dhaca keenay baan, weli unkaynaaye

• Inta aan anaa reer hebel ah, isagu faanayno

• Ololaha qabiilkana shacbiga, loo abaabulayo

• Ha eegina inaan horumarroo, guul la aawilo e

• Qabyaalada uf buu yidhi Rasuulkii, la aaminaye

• Umaad qeybsan howsheeda yaan, abid hagaagayne

• In qabiilku uu Aydhis yahay, cudur wax aafeeya

• Soomaalida ifsaadkii dhexmaray, saynu soo aragnay

• Inan iyo abtigii baa is dilay oo, aaminkii dhimaye

• Tan ebyaye mid kale oon rabaan, idin ogeysiine

• Ugaasyiyo suldaaniyo wax-garad, odayadeenoo dhan

• Ururkii haweenkiyo bulshada, idil ahaanteedba

• Ummadii ma jiro reer ka maqan, saydun aragtaane

• Arrin lagu midoobaan rabnaa, oon ergo u nahaye

• Islaamkuna ismaqal iyo taluu, ku intifaacaaye

• ISkhilaafna waa waxa nabaday, aaya xumadaase

• Waalidna duulka amardiiday waa, laga irdhoobaaye

• Ummaddeeni oo idil haddii, Eebbahay ururshay

• Afkaar inaan wadaagnaa inagay, na anfacaysaaye

• Maantay israaciyo midnimo, noo ekoontahaye

• Aqbal keen noqdoo wixii figrad ah, bixiya aaraa’da

• Nabaddana ayida taladan waad, ku aflaxaysaane

• Tan ebyaye mid kale oon rabaan, idin ogeysiine

• Arartiyo tusaalaha murtida waxaan, usoo oogay

• Indheer-garadka Soomaalidiyo wixii, abwaan sheegta

• Xigmadduu Ilaahay na baray, iyo afwaahdeenne

• Ummaddeena waa inaan maslaxo, ugu adeegnaaye

• Oon wacyi-galin ayaan iyo habee, ku ijtihaadnaaye

• Abshir guulla nabad taamahoo, udubka loo taaggo

• Ubaadkiyo shacbigu waa inay, ku istareexaane

• Aayatiinka nolo fiican waa inaan, abuuraaye

• Arligeena waa inaan dhisniyo, eeriyada guude

• Ilduufkii dorraad nagu dhacay ee eelka nagu reebay

• Urugada qabiilkii na baday ee, iradhada keenay

• Inshaa Allaahu waa inaan haddeer, dhab u ilownaaye

• Axdi iyo kitaab koloo laysmarsado, aamin lagu gaadho

• Ummadyahay midnimo ku arrinsada, eedde baladiiye

• Soomaalidu ideylkeedba waa, ul iyo diirkeede

• Arqabiyo xigaal weeye iyo, oday caruurtiiye

• Waa isu abtiyo seeddi iyo, reer awow dhalaye

• Anaa reer amiir iyo qabiil, aynu wada aasno

• Asluubtiyo dhaqankaan lahayn, aynu wada eegno

• Eray godob leh yaan laysku odhan, eedna la xambaarsan

• Aflagaado yaan qolana qolo, laysku iimaynin

• Isku dhaca qabiilkana maslaxad, waano ku adkeeya

• Ibleyska uga diga iyo colaad, urugo weyn keenta

• Eebaha awooda leh intaan raacno, amarkiisa

• Axadkii wax dila toogta waa, aayad diiniya’he

• Uur fayoobi beeluhu markaa, yey is aaminiye

• Mooryaanta iimaanka la’a iyo, deydeyga ordaaya

• Danbigeena oo ururay yey, ka dhex abuurmeene

• Jeeroo Allaha laga cabsado oo, diinta la adkeeyo

• Udgoonoow rasuulkana sunaha, raacno amarkiisa

• Dulli ina asiibiyo dhibkani, abado weeyaane

• Idaylkeen intaan toobadkeen, eebbahay barino

• Aayadaha qur’aankiyo sunahaan, ku aflaxaynaaye

• Xaqoo lagu adkaadiyo nabadna, galiya uurkiina

• Oo yaan israac iyo midnimo, abid la moogaanin