Maslaxad Qaran

Abwaanku wuxuu gabaygan tiriyey sanadkii 2000 wuxuuna kaga hadlayey maslaxad raadinta ummadda Soomaaliyeed. Wuxuu ku bilaabay:

• Allayahoow macbuud baa tahiyo, maaligii jiraye

• Waxaad maagto adigaan Rabbiyow, ciddi majiirayne

• Dhulkoo magad ah oon daaq lahayn, meel wax laga goosto

• Markuu mayeygu dhawr jeer helee, daadku mulacyeeyo

• Adaa doog madow iyo caleen, maalmo soo bixine

• Cagaar mulaya dhikil maqasha qarin, maanyo hamashowday

• Midho curdana ubax kala midaba, muunad lala yaabo

• Millicsiga il-doogsiga arlada, oo laga maqsuudaayo

• Muska caano lagu daadiyiyo, maalka oo dararsan

• Malyuumaad nimco ah oo aan ciddi, tiro ku meegaarin

• Martabiyo aqoon iyo derajo, maamulkii dunida

• Ku manaysay Aadmiga Rabbow, waana mahaddaaye

• Allahayoow Macbuud tahay iyo, Maaligii jiraye

• Waxaad maagto adigaan Rabbow, ciddi majiirayne

• Muraadkaygu waa nabad codsigaan, maansada u tirine

• Soomaalidii mulkiday dawladii, magaca weyn gaadhay

• Qaran mida markay wada dhisteen, oo meel u wada jeeda

• Kacaankiina uu midho dhalay oo, waayo lays mahadshay

• Mashaariicda iyo horumarkii, maal waxay tabacday

• Maalintay qabiil aamineen, mowdku ka adeegye

• Muraad-seegga hadafkoodii lumay, murugo weyn keenye

• Inay nabad macaan tahay hadday, maanka galiyeene

• Soomaalida Allayahow midee, ooy isu macaanaato

• Bulshada oo midoon qeybsanayn, meella wada taala

• Oon maanka lagu hayn colaad, madaxa lays gooyo

• Khilaaf madax dhexmaray kici shacbiga, laysna maan-dhaafye

• Masiibadii dheacdiyo weerarkii reerba, reer madhiyey

• Isma mahadin Soomaalidii, maanka fududeyde

• Mariid bay la kala kulantay iyo, mur iyo waabeye

• Meydkoodii haaddaa nacdoo, mirey dugaagiiye

• Maalintay qabiil aamineen, mowdku ka adeegye

• Inay nabad macaan tahay hadday, maanka galiyeene

• Soomaalida Allahayow midee, Maalig baa tahaye

• Midabkiisa calankii samada, lagu mataalaayey

• Xiddigtii macnaha loogu dhigay ee, meesha kaga tiilley

• Midowgiyo afgaradkii jiree, lagu mataanoobay

• Mustaqbalka waxay damacsanayd, dawlad magac weyne

• Maalintay qabiil aamineen, mowdku ka adeegye

• Inay nabad macaan tahay hadday, maanka galiyeene

• Soomaalida Allahayow midee, Maalig baa tahaye

• Muqshiyo Hargaysiyo Hobyiyo, meeshi Balad Xaawo

• Mushtarkaa u kala gooshi jiray, meel kastuu rabo e

• Moodharadu ma kala joogsan jirin, maalin iyo leyle

• Nabad lagu mushaaxaa jirtay oon, ciddi ku maagayne

• Malyuumaadyo lacagoo la sido, tuug ma mohanayne

• Haddana ruuxii mara waxaaba dili, beliyo mooryaane

• Muslimiintii axad tobon kun sida, meel u kici waaye

• Maalintay qabiil aamineen, mowdku ka adeegye

• Inay nabad macaan tahay hadday, maanka galiyeene

• Soomaalida Allahayow midee, Maalig baa tahaye

• Ismoodsiiskii hore eey qabeen, malihii beenowye

• Balaayada mar-furatay een la helin, weli wax maareeya

• Maati dooxii dhacay tobanka sano, iyo meydka farahiisa

• Mashaakilka nacaa sii kordhiyo, mahadhadaa ceebta

• Mashaqada xalkeedii lumee, laysna mari waayey

• Inay nabad macaan tahay hadday, maanka galiyeene

• Kibirkiina meel uu ka baxay, mooyi laba waaye

• Maalintay qabiil aamineen, mowdku ka adeegye

• Soomaalida Allahayow midee, ooy isu macaanaato

• Ha midowdo Maxamed yidhi, waayo lagu moodye

• Muddo badan mushkiladiyo colaadihii, la moogaaday

• Qabiil waliba muruq buu is biday, qalabna meeleeye

• Makalaha markii la is jaray eey, muudsadeen dacarta

• Reer reer muquunina karaa, meeshii laga waaye

• Qolo guul mulkiday ma ayna jirin, muruqna beenowye

• Murugo iyo cadaab waxaan ahayn, lama macaashayne

• Mid qabiil ku faaniyo midkii, madax ku doonaayey

• Midna waxay damceen uma hirgalin, oo daaye murankiiye

• Nabad inay macaan tahay hadday, maanka ku hayaane

• Maalintay qabiil aamineen mowdku, ka adeegye

• Soomaalida Allahayoow midee, Maalig baa tahaye

• Muraad adiga oo u kacay oo ka tagay, madasha reerkaaga

• Maalin iyo adoon laba habeyn arag, miciin ruuxa ah

• Harraad kugu marraa’iyo adoo, baahi mucurtaysan

• Reero aadan macriifaba u qabin, magacna sheegaynin

• Wan weyn buu ninkaad soo martido maalintaa qaliye

• Maamuusta dhaqankiyo isagoo, amagaca dhawraaya

• Maxaad deyi kartaa buu ku odhan, maalin iyo leyle

• Kaasoo miidhan raggii kala diley, mahayin sow ma aha?

• Soomaali waa qoys is mudan, kalana maarmayne

• Inay nabad macaan tahay hadday, maanka galiyeene

• Maalintay qabiil aamineen, mowdku ka adeegye

• Soomaalida Allahayow midee, ooy isu macaanaato

• Waa dad diin mid ah leh iyo af qudha, oo mataano ahe

• Midab iyo degaaniyo dhaqanba, waysku meel wudha e

• Haddana waa qaraabo isku maran, jiidh midaa dhalaye

• Soomaalidu waxay kala mudnayd, laga madoobeeye

• Majaraha Ibleys baw hayee, la isma maageene

• Maskaxdoodi maandooriyaa helay, mindhaaleeye

• Maalintay qabiil aamineen, mowdku ka adeegye

• Inay nabad macaan tahay hadday, maanka galiyeene

• Soomaalida Allahayow midee, Maalig baa tahaye

• Abaar magad ah adigoo ka tagay, oo meel kale u doolay

• Soomaali madal ay degtood, maalmo ku nagaato

• Adoo maalku kaa ooman yahay, oon yeel markaa wadanin

• Oo aadan macruufiyo aqoon, magac qof sheegaynin

• Ceel ma’wiya markii aad timaad, reer kastood mudato

• Barbaar muruqyo weyn bay ku siin, oo maalka kuu shubiye

• Macaa yeel inay kuu huraan, oo midig lagaa saaro

• Maalkoodii oo oomanbay kaaga, miga siine

• Gobonimo macaan weeye oo, laysku maamulo e

• Soomaali waa qoys ismudan, kalana maarmayne

• Maalintay qabiil aamineen, mowdku ka adeegye

• Inay nabad macaan tahay hadday, maanka galiyeene

• Soomaalida Allahayow midee, ooy isu macaanaato

• Ma macaashin nimankii, colaadii maqooradaye

• Mana helin muraadkii, waxay muhindisaayeene

• Masiibaday dhigeen iyagoo dhiig, kuwada maydhay

• Muraad seegga waxa ooga daran, meesha ay tagiye

• Danbigoodii midhuhuu dhalay, malabsan doonaane

• Midkii dhintay mutaysigii cadaab, muudsaduu galiye

• Midka noolna murugo iyo cabsibuu, maanka ku hayaaye

• Maalintuu dhintana Jahanabaa, moolka loo galine

• Macbuudkoon adoomaha dulmayn, ayaa marin abaalkiiye

• Macaankaa nabadda ruuxii nacaba, marin-habow qaadye

• Meel-kadhaca gafkii ay faleen ayaa, madal usii yaalle

• Mashaakilkay abuureen dhibkiyo, mahadhaduu reebay

• Anoon tiro ku meegari karin aan, midhadh ka faalleeyo

• Malyuumaad la diley oon lahayn, magiyo dhiig toona

• Malyuumaad hantidii laga dhacoo, fara madoobaaday

• Malyuumaad laxaad beelayoon, ciddi masruufaynin

• Malyuumaad qaxooti u mudh baxay, oo dunida meeraysa

• Malyuumaad mushaar qaadan jiray, oo wada miskiinoobay

• Malyuumaad agoon iyo rajo ahoo, waalidkood dubitay Mooryaantu

• Iyo qaar ku muluqsiibtay doon, oo mawjad ay sababtay

• Oo hirar ku maanshoobay oon, mid laga haynin

• Iyo qaar mucsira oo ahaa, madax la qiimeeyo

• Iyo wixii marwiyo gabadh kufsiga, lagu madiixaayey

• Intaa nimankii maamulay iyo badh aan, meesha laga sheegin

• Eebaha macbuudkaa yaqaan, meesha uu marine

• Masiibooyinkaa soo dhacay eey, mudatay Soomaali

• Macnaha iyo ujeedadaan ka rabo, yaan m eesha ka cadayne

• Waa inaan maslaxad ku dhaqano oon, xumaha maarayno

• Waa inaan macaankeeda nabad, ciddina moogaanin

• Waa inaan ma kala maaranee dhab, u midownaaye

• Waa in layska soo wada masaxo murankii reer-reere

• Maatideena waa inaan qabiil, maanka loo galine

• Waa inhadda mashquulkii jahliga. layska maanaco e

• Mustaqbalka tacliin waa inay, ubadku maalaane

• Maslaxadiyo heshiis baa bulshooy, maanta noo dahane

• Kuwii hore halkii ay mareen, dib uga maantaaga

• Muddo badan qabiilkaan wadneen, meel ku tagi waynay

• Martabo iyo wanaag laguma helin, waad ku madhateene

• Labada marinba ina seejiyoo, mooyi saa nahaye

• Meeshii Eydhiskuu galay qabiil, maaro lagu waaye

• Go’aan mid ah intaad qaadataan, maanta dabar-gooya

• Magacood jir reer hebel nacoo, wadajir meelaysta

• Macbuudkeena caabuda xaqaa, noo martaba roone

• Murtida iyo tusaalaha anoo, meelo badan taabtay

• Xigmaddan meersan iyo waanadaba, galiya maankiina

• Midnimiyo walaalnimo runiyo, mawqif wada yeesha

• Midigtana ku suga nabaddu waa, lagama maarmaane

• Midigtana ku suga nabaddu waa, shey macaan badane