Cali Banfis

The largest online collection of Somali poetry

Gabaygii 2aad ee Banfis

• Kaahaa la wada eegayaa, awr kabaal qabaye
• Koonfur iyo Waqooyiba hadday, laydhu kaafidaye
• Sidii ceel karkaarada xunbada, kor uga soo tuuray
• Nabsigii karuuraaba, u soo kacaa-budhiye
• Kefedii rognaydbaa xaqii, soo kor marayaaye
• Kacaankaad u sacabaynaysaan, waa la kaarahaye
• Dharigay idiin karinayaan, waa kud iyo fare
• Dhunkaal soo kalaankalaysa, baad so kilkilsaane
• Koodhkii Afweyne iyo la tuur, kab iyo xaarkeede
• Kaalintii Bukaasuu galoo, wuu kurbanayaaye
• Kaydkii Amiin buu dhigtay, oo koorihii ga’aye
• Ninka maanta kaalmaynayaa, kayd xun dhaansadaye
• Konton lihii Rashiid lagu diliyo, Kennedi baa u yaale
• Keebka iyo liishaanku waa, kama dambaystiiye
• Haddii koodh la taagiyo haddii, lagaga kaw siiyo
• Waqtigiisiibaa kooban oon, kadab u yeelayne
• Kilaal buu dhex joogaa Cigaal, waana kalidiiye
• Dhaaxuu idin kabankaabiyoo, waydinaan kohane
• Hadii aanu waran kiisu Karin, reer nin kaliyaale
• Waa inaad sidii naag la kaday, kabaha qaadaane
• Mar baan koran xiniinyaha la muday, kebed la saarayne
• Hogaan lagu kaxeeyiyo marbuu, keena-goys yahaye
• Kaymuhuu dibboodaa intuu, kadinka jeexaaye
• Kiintaaladu jiidayo ee, lagu kadeedaayo
• Ee lagu kor fuulaayo ee, lagu karbaashaayo
• Dameerkuba kabaalada marbuu, kabax ka siiyaaye
• Kuray yari wuxuu aar gutaa, maalintuu koro e
• Kudkudaa u liitoo nin geed, waa ka kiciyaaye
• Tolkayow maxaa u kuududaan, laydin kooreeye

Gabayo kale oo ay ka mid ahayeen tuducyadan hoose oo Banfis tiriyey ayaa jiray ee soo raadi:

• Daarood marbuu ii ahaa,mulac sidiisiiye

• Mudug baan kasoo qaadi jiray,maydhab caga weyne

• Milmil iyo Bulaalaba ka dhimay,muranadiiniiye

• Geeltoosiyuhu waa Absame,galafdhabaayaaye

• Galsha miirka iyo uuskii bay,galalafaayaane

• Geedkii awowgood lagu dileey,garab yaxoobaane

• Gidaaraday la wada yuururaan,gar iyo ceebayse

• Waxay talo ku gaadheen inay,laba godleeyaane

• Haddee yaa na gaday waa intay,garsho siisaaye

• Dhaqaalihii godbaa looga riday,gaananaan jiaraye

• Ayax gacan wax lagasiinayaan,ciddi wax gaadhssine

• Guuriye Cagdheeroow hunguri,gabiyo kaa tuurye

• Dooxaa Hargaysaan masaal,kuugu darayaaye

• Mareexaankii waa kaa ka dagay,labada daamoode

• Daaradaan lahaa baa Tindheer,igula doodaaye

• Magaaladu hadday durugtay,waa daris collaadeede

• Iyagaa dalkoodii ka yimid,duulka soo qaxaye

• Daaduunkan ay keenayaan,kama daweeyaane

• Dushaa adi lagaa saarayaa,kugu danaystaane

Banfis IIYuusuf Colaad IYuusuf Colaad IIMakayteIMakayte IIMakayte IIIFakad IFakad IIFakad III